အာဆင်နယ်မှာ ထူးချွန်တဲ့ကြယ်ပွင့်ကစားသမားမရှိဘူးလို့ ပြောခဲ့တဲ့ လေဘာပါတီခေါင်းဆောင်
လေဘာပါတီ ခေါင်းဆောင် ဆာ ခဲလ် စတားမာက ပရီးမီးယားလိဂ် အမှတ်ပေးဇယားဦးဆောင်သူ အာဆင်နယ်အသင်းလူစာရင်းထဲမှာ ထူးချွန်တဲ့ ကြယ်ပွင့်ကစားသမားမရှိဘူးလို့ ပြောကြားခဲ့ပါတယ်။
စတားမာက အာဆင်နယ်ကို အားပေးသူဖြစ်တယ်လို့ ပွင့်ပွင့်လင်းလင်း ပြောဆိုခဲ့တဲ့ ၎င်းရဲ့ ရှေ့က လေဘာပါတီခေါင်းဆောင် ဂျယ်ရမီး ကိုဘင်းလိုပဲ ဂန်းနားပရိသတ်ဖြစ်ပြီး လက်ရှိ အာဆင်နယ်အသင်းအပေါ် ၎င်းရဲ့ ထင်မြင်ချက်ကို ပြောကြားခဲ့တာ ဖြစ်ပါတယ်။
အာတီတာရဲ့အသင်းဟာ လက်ရှိမှာ ပရီးမီးယားလိဂ် အမှတ်ပေးဇယား အဆင့် ၁ နေရာမှာ ၁၀ ပွဲကစားဖို့ ကျန်တော့တဲ့အချိန်မှာ ၈ မှတ်အသာနဲ့ ဦးဆောင်နေတာဖြစ်ပြီး ၂၀၀၄ ခုနှစ်နောက်ပိုင်း ပထမဆုံး အမှတ်ပေးဖလားကို ကိုင်မြှောက်နိုင်ဖို့ ကြိုးပမ်းနေတာဖြစ်ပါတယ်။
ယခုရာသီ မြောက်လန်ဒန်မှာ အင်္ဂလန်ကြယ်ပွင့် ဆာကာအပါအဝင် ဂါဘရီယဲလ် မာတီနယ်လီ၊ အော်ဒီဂွါဒ်တို့လို ကစားသမားတွေက အထင်ကြီးဖွယ်စွမ်းဆောင်ရည် ပြသခဲ့ပေမယ့်လည်း စတားမာက လူစာရင်းတစ်ခုလုံးမှာ အရည်အသွေးတွေက မျှနေတယ်လို့ ခံစားနေရတာဖြစ်ပါတယ်။
“ကျွန်တော် လက်ရှိ အာဆင်နယ်အသင်းကို သုံးသပ်ရမယ်ဆိုရင် မယုံနိုင်စရာကောင်းတဲ့အရာ ၂ ခု ရှိပါတယ်။ တစ်ခုက သူတို့မှာ ထူးချွန်တဲ့ ကြယ်ပွင့်ကစားသမားမရှိပါဘူး။ အူဘာမီယန်းအာဆင်နယ်အတွက် ကစားခဲ့တဲ့အချိန်တုန်းက သူက ထူးချွန်ခဲ့ပြီး အားလုံးက သူ့ဆီကနေ အရာအားလုံးကို လုပ်ဖို့ ကြိုးပမ်းခဲ့ကြတယ်။ အခုတော့ ကျွန်တော်တို့မှာ မကြာခဏဆိုသလို ပွဲကစားပြီးနောက်မှာ ပြောဖို့ခက်တဲ့ အသင်းရှိတယ်(ဘယ်သူက အကောင်းဆုံးကစားသမားလဲဆိုတာ)။ အားလုံးက သူတို့ရဲ့နေရာမှာ ကောင်းကောင်း ကစားနေတာက တကယ်ကောင်းပါတယ်။ ခင်ဗျား ကြယ်ပွင့်ကစားသမားတစ်ဦး၊ နှစ်ဦးအပေါ်မှာ အားထားစရာမလိုပါဘူး။ ခင်ဗျားမှာ အမှန်တကယ် အားကောင်းတဲ့ လူစာရင်း ရှိပါတယ်။”
စတားမာက ပြီးတဲ့နောက်မှာ အာဆင်နယ်နည်းပြ မီခေးလ် အာတီတာကို ချီးကျူးခဲ့ပြီး ဂန်းနားနည်းပြဟာ မယုံနိုင်စရာကောင်းတဲ့ ခေါင်းဆောင်ဖြစ်တယ်လို့ ပြောကြားခဲ့ပါတယ်။
“ကျွန်တော် မီခေးလ် အာတီတာနဲ့ပတ်သက်ပြီး တွေးမိတာက သူက မယုံနိုင်စရာကောင်းတဲ့ ခေါင်းဆောင်ပါ။ သူက ကစားသမားတွေကို မတူညီတဲ့ပုံစံတွေနဲ့ ကိုင်တွယ်ခဲ့တယ်။ အာဆင်နယ်လူစာရင်းထဲက ကစားသမားတိုင်းက ကျွန်တော် အရင်တုန်းက မြင်ဖူးတာထက် ပိုကောင်းအောင် ကစားနေကြပါတယ်။ ဒီလိုမျိုးဖြစ်လာအောင် လုပ်နိုင်တာက အရမ်းကို ထူးခြားပါတယ်။”
“ခင်ဗျား ချာကာကို ဥပမာအနေနဲ့ တွေးကြည့်ပါ။ သူ ကွင်းထဲကနေ ဒေါသတကြီး ထွက်သွားခဲ့တဲ့အချိန်တုန်းက ကျွန်တော် ကွင်းထဲမှာ ရှိနေခဲ့တယ်။ ကျွန်တော် သူ အာဆင်နယ်အတွက် နောက်ထပ်ကစားရတော့မှာမဟုတ်ဘူးလို့ ပြောခဲ့တယ်။ အာတီတာက သူ့ကို ပြောင်းလဲပေးခဲ့ပြီး အခု သူက အပတ်တိုင်း အသင်းလူစာရင်းထဲမှာ ပထမဆုံးရှိနေတဲ့ နာမည်ဖြစ်နေပါပြီ။ အာတီတာဆီကနေ မယုံနိုင်စရာကောင်းတဲ့ ခေါင်းဆောင်မှုအရည်အချင်းပါ”လို့ ပြောကြားခဲ့ပါတယ်။
Arsenal Myanmar
Ref: Internet
