အာဆင်နယ် ချန်ပီယံဖြစ်တာပဲ မြင်ချင်တော့တယ်ဆိုတဲ့ ကာရေဂါ
လီဗာပူးလ် ဂန္ထဝင်ကစားသမားကြီး ဂျေမီ ကာရေဂါကတော့ ဒီနှစ်ရာသီ ပရီးမီးယားလိဂ်ချန်ပီယံဆုကို အာဆင်နယ်အသင်း ဆွတ်ခူးသွားတာပဲ မြင်ချင်တော့တယ်လို့ ဖွင့်ဟလာခဲ့ပါတယ်။
ဂန်းနားတို့ဟာ ဒီတပတ် ကစားခဲ့တဲ့ ပရီးမီးယားလိဂ်ပွဲစဉ်မှာ ဘုန်းမောက်အသင်းကို ၂ ဂိုးပြတ် အရှုံးကနေ နောက်ကလိုက်ကစားခဲ့ရပြီး ပါတေး၊ ဘန်ဝှိုက်၊ နယ်လ်ဆင်တို့ရဲ့ သွင်းဂိုးတွေနဲ့ အံ့မခန်း ပြန်လာနိုင်စွမ်းကို ပြသပြီး အနိုင်သုံးမှတ် ပိုင်ဆိုင်ခဲ့တာပါ။
ဒီလိုပြင်းပြတဲ့ တိုက်ပွဲဝင်စိတ်ဓာတ်မျိုးနဲ့ ချန်ပီယံဆု မျှော်လင့်ချက်အတွက် ရှေ့ဆက်နိုင်ခဲ့တာကို ကာရေဂါက သဘောကျနေတာဖြစ်ပြီး ချန်ပီယံအသင်းတွေရဲ့ စရိုက်လက္ခဏာဖြစ်တယ်လို့ ချီးကျူးခဲ့ပါတယ်။
” စနေနေ့ကပွဲကိုကြည့်ရင်း ကျွန်တော်ကတော့ ဒီလိုမျိုး လုပ်နိုင်တာ ဘယ်နှစ်သင်းလောက် ရှိမလဲဆိုတာပဲ တွေးမိနေတော့တယ်။ နောက်ဆုံးမိနစ်ဂိုးတွေနဲ့ နိုင်ပွဲရယူနိုင်တာမျိုးပေါ့။ ”
” မှတ်မှတ်ရရ ကမ္ဘာ့ဖလားအပြီးကစလို့ အာဆင်နယ်တသင်းတည်းကပဲ ဒါမျိုးလုပ်ပြထားနိုင်တာ (၃) ကြိမ်လောက် ရှိပြီ ထင်တာပါပဲ။ အမှတ်ပေးချန်ပီယံတွေပဲ ဒီလိုမျိုး လုပ်နိုင်စွမ်းရှိတာ ဖြစ်ပါတယ်။ ”
ကာရေဂါက ” ကျွန်တော် အာဆင်နယ် ချန်ပီယံ ဖြစ်တာပဲ မြင်ချင်တော့တယ်။ မကြာမီလာမယ့် နိုင်ငံတကာပွဲရက်တွေကလည်း အာဆင်နယ်အသင်းကို အကျိုးပြုပါလိမ့်မယ်။ ”
” ဒီရာသီရဲ့ နောက်ဆုံးပွဲစဉ်တွေကို အားအင်အပြည့်၊ စိတ်ဓာတ်အပြည့်နဲ့ သူတို့ သွားနိုင်ပါလိမ့်မယ်။ လာမယ့်တပွဲနှစ်ပွဲလောက်ကို ဆက်အနိုင်ယူပြီး နိုင်ငံတကာပွဲရက်မှာ သူတို့ အားပြန်ဖြည့်ရမှာ ဖြစ်ပါတယ်။ ” လို့ ပြောကြားခဲ့ပါတယ်။
Ref : Sky Sports
