အာဆင်နယ်ကို အပြောင်းအရွှေ့မှာ Black List ထဲ ထည့်ခဲ့တဲ့ ပရီးမီးယားလိဂ်ကလပ်နဲ့ နောက်ဆုံးရဂန်းနားသတင်းများ
-မန်စီးတီးဟာ ဂါဘရီယဲလ် ဂျေးဇုနဲ့ ဇင်ချန်ကို တို့ကို ပြီးခဲ့တဲ့နွေရာသီမှာ အာဆင်နယ်ကို ရောင်းထုတ်ခဲ့ပြီး ကစားသမား ၂ ဦးစလုံးဟာ ယခုရာသီ ဂန်းနားတွေကို သိသိသာသာ အားကောင်းလာစေခဲ့တာဖြစ်ပါတယ်။ အာတီတာရဲ့အသင်းဟာ လက်ရှိမှာ ပရီးမီးယားလိဂ်ဖလားကို ရယူဖို့ ကြိုးပမ်းနေပြီး ယခုရာသီ မန်ချက်စတာစီးတီးရဲ့ သရဖူကို စိန်ခေါ်နိုင်တဲ့ အဓိကအသင်းဖြစ်လာခဲ့တာဖြစ်ပါတယ်။
အာတီတာဟာ စီးတီးမှာလည်း အလုပ်လုပ်ခဲ့ဖူးတာကြောင့် ၂ သင်းစလုံးရဲ့ ကစားပုံမှာ ဆင်တူတာတွေရှိနေပြီး အဲဒါကြောင့်ပဲ ဂျေးဇုနဲ့ ဇင်ချန်ကိုတို့ဟာ လွယ်လွယ်ကူကူနဲ့ အံဝင်သွားခဲ့ပြီး ဂန်းနားတွေကို တိုးတက်လာအောင် ကူညီပေးနိုင်ခဲ့တာဖြစ်ပါတယ်။ အဲဒါကြောင့် မန်ချက်စတာစီးတီးဟာ ၎င်းတို့ရဲ့ ကစားသမားတွေကို အာဆင်နယ်အသင်းဆီ နောက်ထပ် မရောင်းချတော့ဖို့ ဆုံးဖြတ်ခဲ့တယ်လို့ Football Insider က ဖော်ပြခဲ့ပါတယ်။
-အာဆင်နယ်ကွင်းလယ်ကြယ်ပွင့်ဟောင်း ဖလာမီနီက အနာဂတ်မှာ မြောက်လန်ဒန်ကလပ်အသင်းကို ဝယ်ယူဖို့ စိတ်ဝင်စားလားလို့ မေးမြန်းခြင်းခံခဲ့ရချိန်မှာ ပြင်သစ်ကွင်းလယ်လူဟောင်းက အာဆင်နယ်ကိုရော အသင်းဟောင်းတွေထဲက တစ်သင်းဖြစ်တဲ့ မာဆေးလ်အသင်းကိုပါ ဝယ်ယူနိုင်ခြေနဲ့ပတ်သက်ပြီး ငြင်းပယ်ဖို့ ငြင်းဆန်ခဲ့တယ်လို့ The Athletic က ဖော်ပြခဲ့ပါတယ်။
“ဒီအသင်းတွေက ကျွန်တော့်နှလုံးသားရဲ့ ထူးခြားတဲ့နေရာတစ်ခုမှာ ရှိနေတာ သိသာပါတယ်။ ကျွန်တော် ဘယ်ကနေလာခဲ့လဲဆိုတာကို ဘယ်တော့မှ မမေ့ပါဘူး။ ဘဝမှာ ခင်ဗျား ဘာမှ ကြိုမသိနိုင်ဘူး။ ဒါပေမယ့် သင့်တော်တဲ့ အခွင့်အလမ်းနဲ့ပဲ ဆိုင်ပါတယ်။ ကျွန်တော်က သင့်တော်တဲ့အချိန်၊ သင့်တော်တဲ့ နေရာ၊ သင့်တော်တဲ့ လူတွေကို အမှန်တကယ် ယုံကြည်သူပါ။ ကျွန်တော်တို့ အနာဂတ်မှာ ဘာတွေဖြစ်မလဲ ကြည့်တာပေါ့။ ကျွန်တော်က ယုံကြည်သူပါ။ ခင်ဗျား တစ်စုံတရာကို အရမ်းလိုချင်ရင် စကြာဝဋ္ဌာကြီးက အဲဒါကို ခင်ဗျားဆီ ယူဆောင်လာပေးလေ့ရှိပါတယ်။ စကြာဝဋ္ဌာကြီးက ဘာတွေ ယူဆောင်ပေးမလဲ ကြည့်တာပေါ့”လို့ ပြောကြားခဲ့ပါတယ်။
-နာပိုလီကြယ်ပွင့်တိုက်စစ်မှူး ဗစ်တာ အိုဆီမန်က အာဆင်နယ်နဲ့ သတင်းတွေ ထွက်ပေါ်ခဲ့ပြီးနောက် တစ်နှစ်တာအကောင်းဆုံး အာဖရိကကစားသမားဆုကို ဆွတ်ခူးပြီး အူဘာမီယန်းရဲ့ ခြေရာအတိုင်း လိုက်နင်းချင်တယ်လို့ Daily Mail ကို ပြောကြားခဲ့ပါတယ်။ အီတလီမှာ အထင်ကြီးဖွယ်ရာသီကို ပိုင်ဆိုင်နေတဲ့ အိုဆီမန်က တစ်နှစ်တာအကောင်းဆုံး အာဖရိကကစားသမားဆုကို ရယူချင်တဲ့ ဆန္ဒကို ထုတ်ဖော် ပြောကြားခဲ့တာဖြစ်ပါတယ်။
“ကျွန်တော် လိမ်ပြောမှာမဟုတ်ပါဘူး။ တစ်နှစ်တာအကောင်းဆုံး အာဖရိကကစားသမားဖြစ်လာဖို့က ကျွန်တော့်ရဲ့ အိပ်မက်ပါ။ ကျွန်တော် အူဘာမီယန်း ဆုရရှိခဲ့တဲ့ ၂၀၁၅ ခုနှစ်တုန်းက ဆုပေးပွဲအခမ်းအနားမှာ ရှိနေခဲ့ပါတယ်။ အာဖရိကကစားသမားတစ်ယောက်အနေနဲ့ ဒီဆုကို အိပ်မက်မက်မိမှာဖြစ်ပြီး ကျွန်တော် ရချင်လည်း ရနိုင်ပါတယ်။ ကျွန်တော့်ရဲ့ ဥရောဘောလုံးလောက ပထမဆုံးအတွေ့အကြုံက ဝုဖ်ဘတ်မှာဖြစ်ပြီး ခက်ခဲခဲ့ပါတယ်။ ဒါပေမယ့် အဲဒါက ကျွန်တော်လုပ်ခဲ့တာတွေအတွက် လမ်းကြောင်းခင်းပေးခဲ့ပါတယ်။ ကျွန်တော် နိုင်ငံပြောင်းကစားရင် လျင်လျင်မြန်မြန်ပဲ အသားကျမယ်ဆိုတာကို သိခဲ့ပါတယ်။ကျွန်တော်က ဖိအားတွေအောက်ကနေ ရုန်းထွက်တဲ့ ကစားသမားမျိုး မဟုတ်ပါဘူး။ ကျွန်တော် အခြေအနေတိုင်းမှာ တည်တည်ငြိမ်ငြိမ်ဖြစ်ဖို့ ကြိုးစားတယ်။ ရာသီက တကယ်ကောင်းကောင်း သွားနေတယ်။ ကျွန်တော် အံ့အားသင့်ဖွယ် ကိန်းဂဏန်းတွေ လုပ်ဆောင်ထားပြီး ကျွန်တော် ရရှိခဲ့တာတွေအတွက် ဂုဏ်ယူမိပါတယ်။ ဒါပေမယ့် ကျွန်တော် မပြီးသေးပါဘူး။”လို့ ပြောကြားခဲ့ပါတယ်။
-အာဆင်နယ်နဲ့ ချဲလ်ဆီးတို့ ၂ သင်းစလုံးဟာ ဘရာဇီးလ်ပါရမီရှင် ဗီတို ရော့ကို ယခုနွေရာသီမှာ ခေါ်ယူဖို့အတွက် ပြင်းပြင်းထန်ထန် တွန်းအားပေးလုပ်ဆောင်နေတယ်လို့ သိရပြီး အသက် ၁၈ နှစ်အရွယ် တိုက်စစ်မှူးဟာ တောင်အမေရိကမှာ အထင်ကြီးဖွယ်ခြေစွမ်း ဆက်လက်ပြသနေတာကြောင့် မန်စီးတီးဂန္တဝင် ဆာဂျီယို အဂွေရိုနဲ့ မန်စီးတီးနဲ့ မန်ယူနိုက်တက်ကြယ်ပွင့်ဟောင်း ကားလို့စ် တီဗက်ဇ်တို့နဲ့ နှိုင်းယှဉ်ခံခဲ့ရတာဖြစ်ပါတယ်။
အာဆင်နယ် အားကစားဒါရိုက်တာ အီဒူးက ဗီတို ရော့ဟာ နေမာနဲ့ ဗင်နီးရှပ်စ် ဂျူနီယာတို့ရဲ့ခြေရာကို လိုက်နင်းဖို့ ယခုနွေရာသီမှာ ဥရောပကို ပြောင်းရွှေ့ဖို့ ပြင်ဆင်နေတယ်ဆိုတာကို သတိပြုမိနေတာဖြစ်ပါတယ်။ TEAMtalk ရဲ့ ဖော်ပြချက်အရ အသက် ၁၈ နှစ်အရွယ် တိုက်စစ်မှူးကို အက်သလက်တီကို ပါရာနာအန်ဆီအသင်းက ထိန်းသိမ်းထားနိုင်မှာမဟုတ်တာကြောင့် ယခုလာမယ့်နွေရာသီမှာ ကျိန်းသေပေါက် ခေါ်ယူလို့ရနိုင်မှာဖြစ်တယ်လို့ သိရပါတယ်။
