ဒက်ကလန် ရိုက်ကို အာဆင်နယ်မှာ မြင်တွေ့ချင်တယ်လို့ ဆိုလိုက်တဲ့ ဂျက် ဝဲလ်ရှား
ဂန်းနားကြယ်ပွင့်ဟောင်း ဂျက် ဝဲလ်ရှားက ဝက်စ်ဟမ်းအသင်းရဲ့ ကွင်းလယ်လူ ဒက်ကလန် ရိုက်တယောက် အာဆင်နယ်အသင်းဆီ ပြောင်းရွှေ့လာတာ မြင်တွေ့ချင်တယ်လို့ ဆိုလိုက်ပါတယ်။
ဝက်စ်ဟမ်းအသင်းခေါင်းဆောင်ဟာ နွေဈေးကွက်အတွက် အာဆင်နယ်အသင်းရဲ့ အဓိကပစ်မှတ်လို့ သတင်းတွေ ထွက်ပေါ်နေသူ ဖြစ်ပြီး နည်းပြ အာတေတာနဲ့ အားကစားဒါရိုက်တာ အက်ဒူးတို့ရဲ့ စိတ်ကြိုက်ကစားသမားလည်း ဖြစ်နေပါတယ်။
အင်္ဂလန်လက်ရွေးစင်အသင်းအတွက် (၄၁) ပွဲ ကစားပြီးထားတဲ့ အသက် (၂၄) နှစ်သားကိုယ်တိုင်ကလည်း ကစားသမားဘဝ နောက်တဆင့်ကို တက်လှမ်းနိုင်ဖို့အတွက် နွေရာသီမှာ အသင်းပြောင်းရွှေ့ဖို့ ဆန္ဒရှိနေတာကြောင့် အာဆင်နယ်အသင်းအနေနဲ့ ခေါ်ယူနိုင်ဖို့ရာ အလားအလာလည်း ကောင်းနေပါတယ်။
တကယ်လို့သာ ဒီအပြောင်းအရွှေ့ ဖြစ်လာခဲ့မယ်ဆိုရင် အာဆင်နယ်အသင်းအတွက်ရော ကစားသမားအတွက်ပါ လုံးဝအကျိုးရှိလိမ့်မယ်လို့ ဂျက်က ယုံကြည်နေပြီး ရိုက်ဟာ နည်းပြ အာတေတာရဲ့ ကစားဟန်နဲ့ လုံးဝ အံဝင်ခွင်ကျဖြစ်မှာ သေချာကြောင်း မှတ်ချက်ပြုခဲ့ပါတယ်။
” သူ (ဒက်ကလန် ရိုက်) ဟာ ကွင်းလယ်လူတဦးအနေနဲ့ အရာအားလုံး လုပ်နိုင်သူ ဖြစ်ပါတယ်။ ဘယ်ပရိသတ်မဆို ရိုက်တယောက် ကိုယ့်အသင်းဆီ ရောက်လာမှာ မြင်ချင်ကြမှာပါပဲ။ ကျွန်တော့်အနေနဲ့ ဒီလိုပြောရတာဟာ ကိုယ်ကျိုးကြည့်ရာ ရောက်လွန်းတာ မှန်ပေမယ့်လည်း မြောက်လန်ဒန်မှာဆိုရင် သူဟာ မီကေလ် (အာတေတာ) လက်အောက်မှာ အကောင်းဆုံး ဖြစ်လာမယ့်သူပါ။ ”
” မီကေလ်ဟာ သူ့ကို ပိုကောင်းတဲ့ ကစားသမားဖြစ်အောင် ပံ့ပိုးပေးနိုင်စွမ်း ရှိပါတယ်။ အသင်းအတွက်လည်း တကယ်ကိုပဲ အကျိုးကြီးမားစေမယ့်ကိစ္စ ဖြစ်ပါတယ်။ ကျွန်တော်ကိုယ်တိုင်လည်း သူနဲ့ စကားပြောဖူးပါတယ်။ သူ လုပ်ပြနေတာတွေဟာ ဘယ်လောက်အထိ ကောင်းမွန်းလှကြောင်းလည်း ပြောဖြစ်တယ်။ သူဟာ ပရီးမီးယားလိဂ်အသင်းကြီးတသင်းရဲ့ အသင်းခေါင်းဆောင်ဖြစ်ပြီး အမြဲလိုလို သင်ယူစိတ်ပြင်းပြသူလည်း ဖြစ်ပါတယ်။ ”
ဂျက်က ” ဝက်စ်ဟမ်းအသင်းကိုတော့ လေးစားမှု ထားရပါလိမ့်မယ်။ သူ့အသင်းကိုး။ ဒါပေမယ့်လည်း သူ့အနာဂတ်ကတော့ သူ့လက်ထဲမှာပဲ ရှိနေပါတယ်။ ဒါဟာ သူ့အတွက် စိတ်လှုပ်ရှားစရာ ဖြစ်နေနိုင်တယ်။ ဘာကြောင့်လဲဆိုတော့ အခုချိန်မှာ သူ့မှာ အရာအားလုံး ရှိနေပြီ။ တနေ့ထက် တနေ့လည်း ပိုကောင်းလာတယ်။ ”
” သူဟာ ဘယ်အသင်းမှာမဆို ကစားနိုင်သူတဦး ဖြစ်လာပါပြီ။ သူ ဘယ်ကိုပြောင်းပြောင်း ကျွန်တော်ကတော့ အားပေးနေမှာပါ။ အာဆင်နယ်အသင်း ဖြစ်လိမ့်မယ်လို့တော့ မျှော်လင့်ပါတယ်။ တကယ့် အပြောင်းအရွှေ့ကြီးဖြစ်ပြီး လုံးဝ အံဝင်ခွင်ကျဖြစ်မှာ အသေအချာပါပဲ။ ” လို့ ပြောကြားခဲ့ပါတယ်။
Ref : Daily Mail
